உடன் பிறப்பே..

சூடு பிடித்துள்ள இந்திய தேர்தல் மற்றைய மானிலங்களை விட தமிழ்நாட்டு தேர்தல்களம் வழைமையை விட சற்று அதிகமாகவே சூடாகக்காணப்படுகின்றது..காரணம் ராஜீவ்காந்தியின் மரணத்திற்கு பின்னர் மீண்டும் பெரியதொரு ஈழத்தமிழ் ஆதரவும்.. அதே நேரம் மீண்டும் தனித்தமிழீழம் என்கிற பேச்சுக்கள் தேர்தல் பிரச்சார மேடைகளில் பகிரங்கமாக அரசியல்வாதிகளால் உச்சரிக்கப்படுகின்றது.ஈழத்தமிழர் மீதான அனுதாபம் என்பது கட்சி அரசியலைத்தாண்டி அனைத்துக்கட்சித் தொண்டர்களிடமும் தமிழர் என்கிற உணர்வால் ஒன்றுபட்டே நிற்கின்றது..ஆனால் அண்மைக்காலமாக சில தி.மு.க.தொண்டர்களிற்கு ஈழத்தமிழ் ஆதரவு என்பது ஒரு சங்கடமான நிலையை தோற்றுவித்துள்ளது.காரணம் புலம்பெயர்ந்து வாழும் ஈழத்தமிழர்களின் கருத்துக்கள் ..கட்டுரைகள்.. இணையத்தளங்களின் விவாத மற்றும் பின்னூட்டங்கள் என்பன கருணாநிதிமீதான வெறுப்புணர்வின் வெளிப்பாடாகவே இருக்கின்றது..இதனால் தி.மு.க ஆதரவாளர்களோ தங்கள் தலைவர் மீது புலம்பெயர் தமிழர்கள் புழுதிவாரி இறைக்கிறார்கள் என்று குறைப்பட்டுக்கொள்வது மட்டுமல்ல.. தமிழீழம் என்று சொல்லி விட்டதால் ஜெயலலிதா உடைனேயே உங்களிற்கு தமிழீழத்தினை ராஜபக்சாவிடமிருந்து புடுங்கித்தரவா போகிறார்.. பொறுத்திருங்கள் அவர் உங்களிற்கெதிராக அடுத்த பல்டியடிப்பார் அப்போ பார்த்துக்கொள்கிறோம்.. என்கிறார்கள்..

முதலில் ஒரு விடயத்தினை தி.மு.க. உறவுகள் புரிந்கொள்ளவேண்டும் ஈழத்தமிழர்கள் கருணாநிதியை குறைப்பட்டுக்கொள்வதால் உடைனேயே அவர்கள் எல்லோரும் ஜெயலலிதாவின் விசிறியாகிவிட்டார்கள் என்று அர்த்தம் கொள்ளும் அபத்தத்தினை செய்யாதீர்கள்..தமிழ்நாட்டில் இப்பொழுது தோன்றியுள்ள ஈழத்தமிழர் ஆதரவு என்கிற தீக்குச்சியை இடதுசாரிகள்தான் உரசினார்கள் அது தனிப்பட்ட முறையில் புலம்பெயர்ந்து வாழும் ஈழத்தமிழர்களினதும் தமிழகத்து இடதுசாரித்தோழர்களினதும் நட்புக்களினால் ஏற்பட்ட கலந்துரையாடல்களினாலும் நெடுமாறன் அவர்களின் முயற்சியாலுமே அது ஆரம்பமானது....அதற்கு வழைமைபோல திருமாவும்..ராமதாசும் ஆதரவு கொடுத்தனர்..பிறகு இவர்களிற்கு ஆதரவாக அரசியல் கணக்கினை கூட்டிக்கழித்து ஜெயலலிதா ஒரு அறிக்கை விடப்போக இங்கேதான் விவகாரம் சூடு பிடிக்கத்தொடங்கியது.. கருணாநிதியும் அனைத்துக்கட்சிக்கூட்டம்.. பதவி விலகல்..உண்ணாவிரதம்..மனிதச்சங்கிலி.. தந்தியடிப்பு..டெல்லிபயணம்.. அறிக்கைகள் ..என்று இப்படியான காட்சிகளெல்லாம் ஈழத்தமிழனின் உயிர்போகும் கதறல்களை பின்னணி இசையாக்கி அரங்கேறிக்கொண்டிருந்தது இவைகளை நான் புதிதாய் இங்கு எழுதிக்கொண்டிருக்கத்தேவையில்லை..அவை இந்த உலகமே அறிந்ததுதான்....

இவற்றையெல்லாம் முன்நின்று நடாத்தியது யாரோ ஊர்க்கோடியில் உண்டு உறங்கி உழன்றுகொன்றிருந்த ஒருவர் அல்ல.. ஒரு மானிலத்தின் அதிகாரத்துடனான சக்திவாய்ந்த முதலமைச்சரால்.. அப்பொழுதெல்லாம் எப்படியாவது யுத்தம் நின்று உயிர்ப்பலிகள் நிறுத்தப்படும் என்கிற நம்பிக்கையினை தமிழின் தொண்டன் தமிழினத்தின் தலைவன் என்று சொல்லிக்கொள்கிற கருணாநிதி மீது ஈழத்தமிழர்கள் அளவிற்கதிகமாகவே வைத்துவிட்டனர்..ஆனால் இந்திய ஆழும்கட்சியுடனான நட்பு அவர்களின் ஈழத்தமிழர் விவகாரத்தின் மீதான பார்வை.. இந்திய உளவுத்துறையினரின் ஆலேசனைகள்..இந்திய வெளிவிவகார மற்றும் உள்விவகார அமைச்சர்களினுடனான தொடர் சந்திப்புக்கள்.. அவர்களின் கருத்துக்கள் அனைத்தையும் உடனுக்குடன் பெற்றுக்கொண்டிருக்கும் ஒரு மானில முதலமைச்சரால் இந்தியாவால் இலங்கை யுத்தத்தினை நிறுத்த முடியாது என்று திடமாகத்தெரிந்தும்.. சிலமணிநேர உண்ணாவிரதம் ஒன்றினை நடாத்திவிட்டு.. ஈழத்தில் யுத்தமும் முடிவடைந்து விட்டது என்று ஒரு அறிக்கையும் விட்டு ஈழத்தமிழினம் அவர்மீது வைத்திருந்த இறுதி நம்பிக்கையையும் துடைத்தெறிந்துவிட்டார்.கருணாநிதியின் யுத்தம் முடிந்துவிட்டது என்கிற அறிக்கையினை பத்திரிகையில் படித்துவிட்டு நம்புகின்ற நூற்றாண்டில் இன்றைய உலகம் இல்லை என்பதனை அந்த அரசியல் சாணக்கியரிற்கு தெரியாமல் போனது சோகம்தான்..அவரின் அந்த அறிக்கையை படித்தபொழுது தமிழகத்து அரசியல் வாதிகள் கோமாளிகள் என்று சிறீலங்காவின் இராணுவத்தளபதி சொன்ன வார்த்தைகள்தான் நினைவிற்கு வந்து தொலைத்தது.. .

இப்படியான ஈழத்தமிழனின் ஏமாற்றங்கள்தான் தனித்தமிழீழம் என்று அதிரடி அறிக்கைவிட்ட ஜெயலலிதா மீதான எதிர்பார்ப்பாக மாறியிருக்கின்றது.. ஏனெனில் நெடிய பாலைவனத்தில் கொடிய வெய்யிலில் கால்வலிக்க நடந்தகொண்டிருக்கும் ஈழத்தமிழனிற்கு தூரத்தே தெரியும் ஒற்றை மரமாய் தெரிகிறார் ஜெயலலிதா.. அது ஆலமரமா?? அத்தி மரமா என்கிற கவலையெல்லாம் அவனிற்கில்லை..காரணம் அவனிற்கு தெரியும் அது இளைப்பாறும் இடமே தவிர அவனது இலக்கு அதுவல்ல..அவரும் தேர்தலில் வென்றதும்.. ஈழமா?? அது எங்கேயிருக்கிறது என்று கேட்கலாம்.. ஏனென்றால் அரசியல்வாதிகளின் பேச்சுக்களிலும் தேர்தல் வாங்குறுதிகளிலும் அதிகம் பாதிக்கப்பட்ட இனம் ஈழத்தமிழினம் என்பதால் எமக்கு அதன் அனுபவங்கள் அதிகமே...1976ம் ஆண்டே எமது அரசியல்வாதிகள் தமிழீழத்தனியரசு என்று வட்டுக்கோட்டையில் முழங்கியபோது எங்கள் கட்டைவிரலைக்கீறி இரத்தத்திலகமிட்டு எங்கள் ஒட்டுமொத்த நம்பிக்கைகளையும் வாக்குகளாக அள்ளிக்கொடுத்து வழியெங்கும் கூடிநின்று கொண்டாடி கொழும்பிற்கு வழியனுப்பிவைத்துவிட்டு.. தமிழீழத்தனியசின் எல்லைகளை கரித்துண்டால் கோயில் மடங்களிலும் மதவுகளிலும் கீறி வைத்துவிட்டு கொழும்பிற்கு போனவர்களின் வருகையையும் எம்மை மறந்து ஆ வென்று பார்தபடி இருக்கவே.. வாய்க்குள் புகுந்த இலையான் எங்கள் நினைவுகளை மீண்டும் கொண்டுவந்ததால்...

கொழும்பிற்கு போனவர்களை காணாமல் கலங்கினாலும் சிலநேரம் தமிழீழத்தனியரசை தவணை முறையிலை வாங்குகின்றார்களாக்கும்.. அதுதான் காலதாமதமாகிது... என்று நினைத்து ..அமிர்தலிங்கம் ஜயா வட்டுக்கோட்டை தீர்மானத்தின்படி தமிழீழத்தனியரசு வாங்கியாச்சுதா?? அது வாங்க காலதாமதமானாலும் பரவாயில்லை தனியரசிற்கு வேண்டிய அரியாசனம்...கொடி..குடை.. ஆலவட்டம் இவற்றையாவது முதலில் வாங்கியனுப்பிவிட்டால்.. அவற்றைப்பார்தாவது சந்தோசப்படுவம் என்று தந்திகளும் அடித்தோம்..அப்பொழுது எங்கள் ஜயாவிற்கு தமிழே மறந்துபோயிருந்தது..வட்டுக்கோட்டையை படிக்கத்தெரியாமல் வட்டக்கொட்டையா???வட் இஸ் திஸ் நான்சன்ஸ் என்றபடி தந்தியையும் தமிழீழத்தனியரசையும் சேர்த்தே குப்பைக்கூடையில் எறிந்தபொழுதுதான் எங்கள் ஊர்களில் உள்ள புளிய மரங்கள் மட்டுமல்ல... வேலி பூவரசு மரங்கள்கூட போதிமரமாகி ஈழத்தமிழர்களிற்கெல்லாம் வேண்டிய ஞானம் கிடைத்து விட்டது..எனவே தமிழகத்து உறவுகளே நாங்கள் எதை இழந்தாலும் உங்களை உங்களின் உண்மையான உணர்வுகளை எமக்காக உயிர்கொடுக்கும் உன்னதமான தியாகங்களை என்றென்றும் மறவோம்.. மதிப்போம்.. எனவே இந்தியாவில் இக்கட்டான காலகட்டங்களிலெல்லாம் அரசியல்வாதிகள் திரும்பியும் பாராத வேளைகளில் எங்களிற்கு உதவியவர்கள் நீங்களே..எங்கள் உண்மையான உடன்பிறப்புக்கள் நீங்களே.... பதவி என்பது தோழில் உள்ள துண்டுபோல என்று கூறிக்கொண்டே பதவிக்காக அந்தத் துண்டினால் முகத்தை மூடிக்கொண்டு அம்மணமாய் நிற்கும் அரசியல் தலைவர்களல்ல.

.நன்றி..