லண்டனில் பாமரனும் ஜீவஜோதி கடை வடையும்

நான் கடந்த இரு வாரத்திற்கு முன்னர் லண்டனில் நின்றபொழுது எனது நண்பரும் ஒரு பேப்பர் ஆசிரியருமான கோபி வீட்டில்தான் தங்கி நின்றனான். அப்பொழுது கோபி சென்னார் பாமரனும் இந்தியாவிலையிருந்து வாறார் நேரமிருந்தால் அவரையும் சந்திச்சிட்டு போகலாமென்றார்.அனேகமாக பாமரனும் இலண்டனிலை நடந்த பேரணிக்கு சிலநேரம் வரலாம் அப்பிடி வந்தால் அங்கையே சந்திக்கலாமென்று நினைத்து எதற்கும் பாமரன் முதலிலை லண்டனுக்கு வந்திட்டாரா இல்லையா என்பதை உறுதிசெய்ய பாமரனை விமான நிலையத்திற்கு அழைத்துவர போனவரிற்கு போனடித்து......."பாமாரன் வந்திட்டாரா??"...என்று விசாரித்தோம்..அந்தநண்பரோ கடுப்பாகி பாமரன் வரவேண்டிய பிளைட் வந்து .. எல்லாரும் வெளியிலை போய்கொண்டிருக்கிறாங்கள்.யாரைப்பாத்தாலும் படிச்சமனிசராய்தான் தெரியிது ஆனால் பாமரனை காணேல்லை என்றார்..சரி பாமரன்தானே பாதைமாறி எங்கையாவது போய் யாராவது இழுத்துவந்து வெளியிலை விடுவாங்கள்தானே அப்பிடி வந்தால் ஊர்வலம் முடியிற கை பார்க் திடலுக்கு வாங்கோ சந்திப்பம் என்றுவிட்டு நாங்கள் ஊர்வலத்திற்கு போயிட்டோம்..


பாமரனும் தான்வரவேண்டடிய விமானத்தை தவறவிட்டு அடுத்த விமானத்தை பிடித்து லண்டன் வந்து....கை பார்க் திடலிற்கு அன்று வந்திருந்தாலும் அங்கிருந்த ஒன்றரைஇலச்சம் சனத்திரளிற்குள்ளை ஒரு பாமரனை தேடிப்பிடிக்கமுடியமல்போய்விட்டது..

அதாலை அடுத்தநாள் காத்தாலை றெயினஸ் வீதியில் சந்திக்கலாமென நானும் கோபியும் சந்திக்கப் போயிருந்தம்.. பாமரனும் அவரின்ரை ஈழத்து நண்பர் கருணாவோடை(அந்தக் கருணா இல்லை)வந்திருந்தார்.. எங்கள் தேசிய பானமான டீ குடிச்சுக்கொண்டே கதைக்கலாமென்று நினைத்து அருகிலிருந்த அண்ணாச்சியின் சரவணபவான் கடைக்குள்ளை புகுந்து துண்டைபோட்டு உக்காந்து நாலு டீ ஒடர் பண்ணிவிட்டு ..பாமரனிட்டை என்ன சாப்பிடுறிங்கள் என்றேன்....அவர் இது என்ன கடை சைவமா?? அசைவமா ??என்றதும்..


கோபி.. அவரிடம் .. இது நம்ம அண்ணாசியோடை சரவணபவான் சைவம்தான் என்ன சாப்பிடறீங்க என்றார்...

அட நம்ம ஜீவஜேதிகடையா........ அப்ப வடை நல்லாயிருக்கும்..எனக்கு இரண்டு சாம்பார்வடை சொல்லுங்கப்பா என்று பாமரன்.சவுண்டு விட ...

அங்கிருந்த சர்வரும் நாமளும் தமிழ்நாட்டுக்காரர்தான்.. மதுரை பக்கம் என்றார்..

அவரைக்கூப்பிட்டு பாமரனைக்காட்டி இவரு தமிழ்நாட்டிலை பெரீய்ய்ய்ய்......ய எழுத்தாளர் பாமரன்னு பேரு.. வடை சாப்பிடுறதுக்காகவே இந்தியாவிலை இருந்து இங்கை வந்திருக்கிறார்..சூடா நாலு சாம்பர் வடை கொண்டங்க எண்டதும்... சர்வரோ பாமரனா?? என்று தலையை சொறிய நானும் விடுவதாக இல்லை.... என்னசார் பாமரன் கேள்விப்பட்டதில்லையா?? குமுதத்திலையெல்லாம்..கும்மியடிப்பாரே அவருதான் என்றதும் ..

தன்னை ஓவராய் பில்டப்பண்ணி காட்டுறாங்களா??? இல்லை இப்பிடி லண்டனிலை வைத்து பழிவாங்கிறாங்களா என்று பாமரன் யேசித்து கடுப்பானாரோ தெரியாது.. யோவ்.. பார்த்தஉடைனையே படக்கின்னு கண்டுபிடிக்க நானென்ன நமீதாவா???

.முதல்லை வடையை கொண்டாங்கய்யா என்றதும்..சர்வர் தப்பித்தோம் பிழைத்தோம் என்றதைப்போல அங்கிருந்து ஓடிப்போய் நாலு சாம்பர் வடையை கொண்டந்து வைக்கவும்... பாமரன்

"வெங்காயம்... வெங்காயம்.." எண்டார்....நானும் இவரு தன்னைதெரியாதென்று சொன்ன சர்வரை பெரியாரைப்போலவே வெங்காயம் என்று திட்டுகிறார் என்று நினைத்து.. பாவம் விட்டிடுங்க ஏதோ தெரியாமல் தெரியாது என்று சொல்லிட்டான் வடையை சாப்பிடுங்க என்றவும்..

அவரோ சாம்பார் வடைமேலை தூவியிருந்த பச்சை வெங்காயத்தைக்காட்டி அதில்லையா நான் பச்சைவெங்காயம் சாப்பிடுறதில்லை அதாவை வெங்காயம் போடாமல் இரண்டு வடை கொண்டாரசொல்லுங்க என்றார்..

பிறகென்ன அவரது வடையையும் நான் என்பக்கம் இழுத்து விட்டு அவரிற்கு வெங்காயம் இல்லாத இரண்டு வடை ஓடர்பண்ணிட்டு இருக்க பாமரனின் செல்போன் சிணுங்க காதில் வைத்தவர் என்னைப்பார்த்து நம்ம ஓசை செல்வா பய பேசுறான் என்றுவிட்டு.. ...

ஆமாண்டா எப்பிடி இருக்கிற... நான் நம்ம ஜீவஜோதி கடையிலை வடைசாப்பிட்டிட்டு இருக்கிறமில்லை ... என்று சொல்லும்போது வடையுடன் வந்த சர்வர் வடையை வைத்து விட்டு ஜீவஜேதியா அது யாருங்க என்றார்...அப்பொழுதான் புரிந்தது அவரிடம்போய் பாமரனை தெரியுமான்னு கேட்டது எவ்வளவு பெரீரீரீ......ய்ய....தப்புன்னு...